Mahlwärch

S‘ Mahlwärch isch s‘ Härz vonere Mühli und ohni das isch d‘ Mühli kei Mühli, sondern numme e Holzhülse.
D‘ Mahlwärch wo ich verwände sind alli vom Strässler in Rafz. E sind i mine Auge die Beschte wo’s git, komplett us Metall und mer isch sehr flexibel, will Salz- und d‘ Pfäffermahlwärch i de Ussemass idäntisch sind und drum chann eifach gwächselt wärde. De Mahlgrad isch vo unne eifach und stufelos verstellbar. Wänn mer dänn obe drüllt verstellt sich de Mahlgrad nid.

Die Mahlwärch sind für d‘ Ewigkeit gmacht!

Isch Keramik nid besser als Stahl?

Keramik isch härter als Stahl, das isch unbestritte, aber wills ebe au härter isch, ische es spröder und gaht gärn kaputt wänns en Schlag überchunnt (drum sind üsi Mahlwärch ebe isatzghärted und nid dure ghärtet). Au wänns kei Pfäffer meh dine hät oder wänn mer de Mahlgrad fiiner stellt, chönnd d‘ Mahlzäh abbräche. Es Stückli Keramik uf de Pizza chann für d Zäh verherend si.
Ich han au uf de ganze Wält keis Keramikmahlwärch gfunde wo mich technisch überzüügt hät. Jedes hät Kunststoff drah.
Bi Kermikmahlwärch wird de Pfäffer verribe und nid fiin gschnitte, was sich im Gschmack niederschlat und s‘ Mahlwärch ehnder verstopft.

Pfäffermahlwärch

S‘ Pfäffermahlwärch isch us isatzghärtetem Stahl, d.h. d Oberflächi isch sehr härt (60 HRC), aber de Chärn isch trotzdäm nid spröd. Es hät äxtra grossi Zueführnuete, damit d‘ Mühli nid verstopft und damit s‘ Pfäfferchorn abgschärt (fiin gschnitte) und nid vertruckt wird. Drum chönnd sich die ätherische Öl vom Pfäffer besser entfalte und bedüütet en Gschmacksvorteil.

Salzmahlwärch

S’Salzmahlwärch isch i de Usemaas gliich wie s‘ Pfäffermahlwärch, aber us roschtfreiem Stahl. D‘ Oberflächi vo dem Stahl isch beschichted mit Titannitrid, was ihm au die goldig Farb git. Es hät e sehr grossi Härti vo über 2000 HV (Vickers), will s Salz au dütlich härter isch wie Pfäffer. D‘ Mahlgradverstllig isch genau gliich wie bim Pfäffer.

gsteckte Version

Einzelni Exemplar mach ich au inere gsteckte Version. Da isch eifach d‘ Atriebswälle nid dur de Chopf gfühert und drum fählt uf em Chopf obe die klassisch Schruube.
Es isch Gschmacksach, die einte findet, bin ere Mühli muess e Schruube obedrah sii, die andere säged: “ Äntli eini ohne die doof Schruube“.
Au da, isch de ganz Mechanismus komplett us Metall; de Chopf chann eifach abzoge wäre, bzw. raschted mit eme Klick wieder ih.

Muskatmühli

D‘ Muskatmühli isch einzigartig, will mer d‘ Muskatnuss dur e Bohrig i d‘ Mühli ladt und zueluge chann wie sich d‘ Nuss a de Ribschibe verribe wird. Kei Fingernägel oder Chnödli müend drah glaube und bime Raclette cha jede wos gärn hät achli Muskat a sini Härdöpfel tue. Anstatt de Bohrig für d‘ Nuss chann mer au e gschrubti Version mache, da ich aber alli Mühlene us eim Stuck mache und d‘ Maserig durchgehend isch, chann ich das binere gschrubte Version nid gwährleischte.

Muskatmühli Eibe (Aschtgable)